BIRTLHren proiektua finkatzea (hamaika heziketa-zikloetatik zazpi modalitate erdipresentzialean dira) ezinezkoa izango zen EAEko hiru lurraldeetako lanbide-heziketako zentro laguntzaileen sarean duen laguntzarik gabe, bertan ematen baitira modulu jakin batzuei lotutako lanbide-konpetentziak lortzeko behar diren saio presentzialak. Baina hortik harago, BIRTLHk beti egin du zentro laguntzaileekiko harremanak sendotzearen alde, eta horren adibide ona dira Hernani Lanbide Heziketa ikastetxearekin eta Fundiciones Seiak enpresarekin lankidetza estuan egin diren ikus-entzunezko ekoizpenak. Hezkuntza-bideoak dira, eta aluminio urtuzko pieza bat egiteko prozesu osoa azaltzen dute, moldearen diseinutik hasi eta azken pieza lortu arte; BIRTLHren kasuan, Ikasgela Birtualean erabiltzeko prestatuta daude, eta Hernaniko zentroarentzat hezkuntza-material lagungarri gisa.

Xabier Amilibia Fabrikazio Mekanikoko Diseinuko zikloko Galdaketako Moldeen eta Ereduen Diseinua moduluko irakaslea da: “Hain interesgarria iruditzen zitzaidan Hernanin ikasleei planteatzen zieten ETHAZI erronka, hau da, molde bat diseinatu, fabrikatu eta pieza urtzea Seiak enpresan, guk ere aletxo bat jartzea proposatu niela, hain zuzen ere, diseinua baliozkotzeko tarteko fase bat sartzea gure QuikCast simulazio-softwarea erabilita (solidotze-prozesua simulatzen du eta sortu daitezkeen arazoak iragartzen ditu). Gainera, BIRTLHko ikus-entzunezko taldeak proiektu osoa grabatu eta muntatu ahal izango luke, kalitate handiagoko edukia lortuz. Ideia horrek konbentzitu zituen eta abian jarri ginen. Horrela, elkarrekin grabatu genuen lehen bideoan pieza bat hareazko moldekatzearen bidez galdatzeko prozesu osoa ilustratzen da, eta ikasturte honetan grabatu dugun bideoan lost-foam metodoaren bidezko galdaketa prozesua. “

 

 

Irakasleak eskerrak eman nahi izan dizkie Hernani Lanbide Heziketa institutuari eta Seiak galdaketa-enpresari ekimen honetan laguntzeagatik.